अडिटर नै नक्कली बिल कारोबारी 

काठमाडौं । अडिटर अर्थात लेखापरीक्षक नै नक्कली बिल कारोबारमा संलग्न रहेको पाइएको छ । राजस्व अनुसन्धान विभागले गरेको अनुसन्धानमा नक्कली बिल बनाएर बेच्ने कार्यको नेतृत्व लेखापरीक्षकले नै गरेको खुलेको हो ।
अनिल गुप्ता नाम गरेका ‘ख’ श्रेणीका अडिटरले नक्कली बिल बेचेर ५० करोड रुपैयाँभन्दा बढी राजस्व चुहावट गरेको अनुसन्धानबाट खुलेको हो । गुप्ताले आरोप स्वीकार गरिसकेका छन् भने कागजपत्रको अधययनबाट उनको कसुर पुष्टि भइसकेको विभाग स्रोतले जानकारी दियो ।
विभागले उच्च अदालत पाटनमा मुद्दा दायर गर्ने तयारी गरेको छ । गुप्ताले कपडा, रेडिमेड जुत्ता–चप्पल आयात गरेको देखाएका छन् । उनको कुनै कारोबारस्थल अर्थात सामान भन्डारणस्थल छैन ।
सानो कार्यालय खडा गरेका छन् । भ्याट, प्यान, खरिद–बिक्री खाता सबै बिल–बिजक अद्यावधिक गरेका छन् । भ्याट विवरण बुझाएका छन् भने आयकर पनि तिरेका छन् । थोरै–थोरै अरु कर पनि तिरेको देखिन्छ ।
तर, उनको आयातीत सामान राख्ने गोदाम छैन । १ रुपैयाँको सामान पनि भौतिक रूपमा बेचेको देखिँदैन । स्रोत भन्छ, “सबै बिल नक्कली बनाउँदै बेचेका छन् ।”
विभागको अनुसन्धानबाट गुप्ताले कपडा तथा रेडिमेड सामान आयात गरेर डन्डी, सिमेन्ट, फोटोकपी कागज, टोन, पाइप फिटिङ्स बेचेको बिल बनाएका छन् । स्रोतले भन्यो, “जहाँ जसलाई जस्तो प्रकारको बिल चाहिएको छ, त्यस्तै बिल जारी गर्ने गरेको पाइएको छ ।”
पछिल्लो अवधिमा कर छलीको फरक प्रवृत्ति मौलाउँदा छन् । यसअघि, अरु व्यक्तिले नक्कली बिल बनाएर बेच्ने गरेको भए पनि लेखापरीक्षक अर्थात् संगठित ढंगले यस्तो कार्यमा लागेको पहिलो घटना हो ।
आरोपित लेखापरीक्षकसँग बिल किन्नेलाई पनि अनुसन्धानको दायरामा ल्याइएको छ । बिल किन्ने व्यक्तिलाई आफ्नो व्यवसायको प्रकृतिअनुसार बिल चाहिएपछि गुप्ताले सोहीअनुसारको बिल तयार पारिदिने गरेको पाइएको छ ।


तपाइको प्रतिक्रिया दिनुहोस्